ُالسَّلاَمُ عَلَيْكُم ْوَرَحْمَةُ اللهِ وَبَرَكَاتُه
C I N T A
C (inta); satu kata nyang sering bikin orang klepek-klepek kaye ikan mas kekurangan aer di empang Cengkareng. Banyak nyang nanya ama Abi, "Bi, cinta itu apaan sih? Kok Abi kalo ngomongin cinta kaye nyang paling paham aje?" Jujur aje, Tong, Abi sendiri kadang masih ngeraba-raba maknanye. Karena bagi kite Anak Betawi Cengkareng, cinta itu kaga cukup cuma modal gombalan di bibir doang, tapi kudu tembus ampe ke sumsum tulang! Hehehe.
Eitss... jangan su'udzon dulu, Tong! CINTA nyang Abi maksud di sini BUKAN sebatas cinta monyet ala Gen-Z nyang akronimnye bikin Abi pengen elus dada:
- 💔 "Cerita Indah Namun Terus Amblas"
- 🥀 "Cerita Indah Namun Tiada Arti"
✨ Cerita Indah Nan Tiada Akhir ✨
Alias CINTA SEJATI. Cinta nyang bikin kite makin deket ama Kholiq, makin sayang ama keluarga, dan makin peduli ama sesama.
Filosofi Cinta "Tulang Punggung"
Cinta itu energinye dasyat, Tong. Liat aje perjuangan almarhumah Ummi Hasanah (Ummi-nye Abi). Beliau itu simbol cinta sejati nyang nyata, bukan cuma teori di buku-buku. Bayangin, empat tahun lamanye beliau nahan sakit kanker nyang luar biasa, tapi beliau simpen rapet-rapet sendiri. Kenapa? Demi kagak mau liat anak-anaknye dan suaminye (Abuya) jadi sedih atau kepikiran.
Beliau tetep senyum, tetep ngurusin keluarga kaye orang sehat walafiat. Itu baru namanya cinta nyang punya "tulang punggung", cinta nyang berkorban tanpa banyak cakap, bukan cuma cinta "bibir manis" nyang gampang amblas pas ada masalah dikit. Dari beliau, Abi belajar kalo cinta itu tentang memberi nyang terbaik, bukan cuma menuntut dilayani.
Kenapa Abi Jadi "Plagiator" Cinta?
Demi nyari makna cinta nyang beneran tulus, Abi rela jadi PLAGIATOR. Abi kaga malu ngakuin ini. Tapi Abi bukan plagiat konten orang di internet ye! Abi copas adab-adab cinta dari para Nabi nyang sabarnye minta ampun pas dikasih ujian berat. Abi salin kasih sayang dari para Ulama nyang ikhlasnye kaga berujung biarpun dizholimi. Abi contek pengabdian dari orang tua Abi nyang kasih sayange sepanjang galah.
Apalagi ente nih para Gen-Z, jangan dikit-dikit galau gara-gara chat kaga di-read atau diputusin pas lagi sayang-sayange. Itu mah bukan cinta, itu mah baperan tingkat dewa! Cinta itu perjuangan, kaye Abi dulu pas di Pondok Modern Gontor angkatan Classic '91. Belajar disiplin, nahan rindu sama keluarga di Cengkareng demi raih cita-cita, itu semua dasarnye cinta sama ilmu dan masa depan.
اَللّٰهُمَّ ثَبِّتْ قُلُوْبَنَا عَلَى دِيْنِكَ وَعَلَى مَحَبَّتِكَ وَعَلَى مَحَبَّةِ رَسُوْلِكَ مُحَمَّدٍ صَلَّى اللهُ عَلَيْهِ وَسَلَّمَ
"Ya Allah... tetapkanlah hati kami untuk senantiasa berada dalam agama-Mu, senantiasa dalam kecintaan kepada Engkau dan senantiasa cinta kepada Rasul Engkau, Nabi Muhammad SAW..."
Adab Cinta buat Gen-Z di MAN 1 Jakarta
Abi perhatiin, anak-anak jaman now kalo udah ngomongin cinta, gayanye selangit kaye pilot bawa pesawat tempur. Tapi giliran disuruh cinta ama buku pelajaran atau cinta ama sholat jamaah di masjid, langsung meriang panas dingin. Padahal, cinta itu kudu adil, Tong! Cinta ama makhluk jangan sampe ngalahin cinta ama Sang Pencipta.
Kalo ente beneran cinta ama Allah, otomatis ente bakal tau cara ngehormatin perempuan, tau cara ngehargai orang tua, dan tau cara jaga diri dari maksiat. Jangan cuma pinter bikin status galau, tapi adabnye nol besar. Cinta itu mendidik, bukan malah bikin kite jadi lembek bin cengeng!
Sahabat... Itulah kepingan pertama dari konsep CHAT & SHARE Abi. Inget, C-nya itu Cinta. Kalo ente punya cinta, jangan dipendem sendiri kaye harta karun. Bagiin! Kasih senyum ke tetangga, kasih perhatian ke orang tua selagi beliau masih ada. Biar berkah idup kite makin menjalar kaye taneman merambat!
وَالسَّلاَمُ عَلَيْكُمْ وَرَحْمَةُ اللهِ وَبَرَكَاتُه
🚩 SEMBOYAN ANAK BETAWI:
"Aseli Betawi mah tetep tegak, ilmunya mantep, budayanya kaga bakalan retak!
Cinta sejati udah Abi bahas sampe tuntas,
Biar idup berkah, rasa sayang kaga boleh lepas!"
Tidak ada komentar:
Posting Komentar