السَّلاَمُ عَلَيْكُم ْوَرَحْمَةُ اللهِ وَبَرَكَاتُه
Abi Ahmad Thoufur (Ustadz Betawi Cengkareng)
Alhamdulillaah, Pintu Blog Kembali Ngablag!
Para jamaah pembaca sekalian nyang dirahmati Allah, wabil khusus HaMaSah Big Family (Keluarga Besar Haji Matoni dan Hajjah Hasanah), murid-murid Abi di MAN 1 Jakarta nyang gokil-gokil, kawan-kawan guru sejawat, jama'ah, ampe warga Cengkareng nyang kaga ada matinye... Gimane kabarnye? Sehat semua kan? Kalo kata orang Betawi mah, "Kalo kaga sehat, mana bisa kite ngopi sambil baca tulisan Abi!"
Hari ini, tanggal 11 Januari 2026, Abi rasanya kayak dapet tenaga baru. Ibarat batere hape nyang udah di-charge 100%, Blog ANAK BETAWI ASLI (BABA) resmi "buka pintu" lagi. Setelah 13 tahun blog ini tidur panjang, Abi kepanggil buat balik nulis karena liat fenomena murid jaman sekarang nyang jempolnya lebih lincah di layar HP ketimbang buka kitab. Abi pengen wadah kite ngobrol ini makin asik, makin adem, dan nyang paling penting... makin berkah buat bekel akhirat. Amin!
Kenapa Harus "Blog Anak Betawi Asli"?
Mungkin ada nyang nanya, ""Bi, ape sih kerennya nama Betawi Cengkareng yang sering Abi sebut BeCeng?"" Ealah... dengerin dulu, Tong! Nama ini bukan sembarang nama. Ini 'penampakan' rasa bangga Abi ama tanah kelahiran. Cengkareng itu saksi bisu Abi dari jaman bocah ampe jadi aki-aki beranak cucu. Dari jaman main di empang sampe jaman ngajar anak-anak Gen-Z pake teknologi AI. Nama ini adalah pengingat biar Abi kaga lupa sama akar budaya sendiri. Biarpun kite udah di jaman modern, Asli Betawi mah harus tetep tegak!
"
Semangat Ayahanda, Matoni: Dedikasi & Perjuangan
Ummi Ela (Ayang Ytc): Cinta Sejati Dunia Akhirat
Blog ini Abi dedikasikan (dikit pake bahasa keren kagak napa kali yee?) buat ngerawat sejarah leluhur kite. Di sini ada semangat Ayah Abi yang di kampung dikenal juga sebagai Ayah BeCeng nyang hobi banget main bola—liat aja fotonya, gagah bener kaye pemain timnas jaman dulu! Beliau ngajarin Abi tentang ketangguhan. Terus ada Ummi Ela, belahan jiwa nyang selalu setia nemenin Abi dari jaman susah ampe jaman sulit lagi sekarang, hehehe. Banyolan doang ini mah Tong, Kite mah happy always gimane juga kondisinye. Tanpa doa dan teladan Ayah-Ummi dan kesetiaan dan pengertian, kaga bakalan ada sosok Abi nyang ente kenal sekarang nih.
Sebagai alumni Gontor Classic '91, Abi megang prinsip خَيْرُ النَّاسِ أَنْفَعُهُمْ لِلنَّاسِ. Jadi, tulisan di sini bukan cuma buat gaya-gayaan, tapi buat nebar manfaat.
Bakal Ada Apa Aja di Mari?
Biar ente kaga bosen, Abi udah ngerancang konten nyang gado-gado tapi tetep bikin kenyang hati:
Ngaji Kitab Kuning:
Bedah kitab Kasyifatus Saja ama Kitab Turots laennya pake gaya santuy. Jalur sanad Abi diantaranya abi dapetin langsung dari ngaji ke almaghfur lah Mu'allim K.H. Muhammad Syafi'i Hadzami, biar ilmu kite berkah dan insya Allah jadi kaga "nyasar".Pengalaman Abi sebagai Pendidik: dari
Cerita Abi ngadepin murid MAN 1 Jakarta nyang kelakuannye macem-macem. Dari nyang pinter sampe nyang pinter.... cari alesan! wkwkwk Sampai tetek bengek nyang terkait ama pemberian materi alias pelajaran.
Budaya dan Sejarah Betawi:
Ngerawat jati diri Betawi biar anak muda kaga lupa ama tanah air sendiri gara-gara terlalu sibuk "kebule-bulean".Butiran Hikmah:
Apaan aje nyang manfaat menurut Abi buat ente, dari dalil naqli ampe aqli, dari omongan manfaat ampe omongan sesaat, dari materi khutbah ampe ceramah Abi di berbagai instansi ampe materi pelajaran, Abi sajiin buat ente, biar manfaatnye bisa nyampe ke rumah-rumah ente semua.
Warisan Sejarah Abi Tahun 1972: Kebersamaan Keluarga Besar Betawi nyang Kaga Ada Duenye!
Nulis itu adalah cara Abi buat tetep hidup selamanya. Kata Imam Al-Ghazali:
إِنْ لَمْ تَكُنِ ابْنَ مَلِكٍ وَلَا ابْنَ عَالِمٍ فَكُنْ كَاتِبًا
"Kalo ente bukan anak raja dan bukan anak ulama besar, maka nulislah!"
Dalam manaqib Imam Ahmad bin Hambal alias Imam Hambali juga kedapetan ungkapan hikmah beliau:
مَعَ الْمَحْبَرَةِ إِلَى الْمَقْبَرَةِ
"Barengan tempat tinta ampe ke kuburan."
Makanya Abi tulis deh apaan aje semua di sini. Biar nanti cucu-cucu Abi, murid-murid Abi, bisa baca dan ambil hikmahnya kalau Abi udah kaga ada nantinye.
ANGKATAN CLASSIC GONTOR '91
Jadi, Abi mohon doanya biar Abi istiqomah nulisnya. Kalo mampir, jangan cumanan liat-liat doang kayak ente lagi keliling mall Ciputra, tapi tinggalin jejak di komentar yaa... Mo nanya hukum, mo nanya kabar, atau mou nawarin emping jengkol juga Abi terima! Wkwkwk.
Terakhir, blog ini Abi "tasyakkurin" dengan niat Billaah, Lillaah, Fillaah. Moga-moga jadi ladang pahala jariyah buat Abi, keluarga, dan ente semua nyang baca, kalau mo praktekkin pastinye. Inget! Ilmu itu cahaya, jangan sampe hati kita waktu hidup kayak rumah lagi mati lampu!
وَالسَّلاَمُ عَلَيْكُمْ وَرَحْمَةُ اللهِ وَبَرَكَاتُه
🚩 SEMBOYAN USTADZ BETAWI NYABLAK
"Aseli Betawi mah tetep tegak,
ilmunya mantep, budayanya kaga bakalan retak!
Biarpun Blog Baru Digelar, Semangat Ngaji Harus Terus Ditebar!"
#Bismillaah #TasyakkuranBABA
Assalamualaikum abi
BalasHapus