السَّلاَمُ عَلَيْكُم ْوَرَحْمَةُ اللهِ وَبَرَكَاتُه
14 Februari
Say Yes to Islam and Say No to Valentine
(Milad Hadratussyekh KH. Hasyim Asy'ari)
Hadratussyekh KH. Hasyim Asy'ari
Ya ikhwati fillah, jamaah pembaca setia BABA nyang Abi banggain... Ape kabar nih di pertengahan Februari tahun 2026 ini? Moga-moga iman kite kaga luntur kegiles zaman, dan semangat kite buat nyari ilmu tetep membara kaye tungku nasi uduk Mpok Leha di Cengkareng. Amin!
Hari ini, 14 Februari. Kalo ente keluar rumah atau buka sosmed, pasti isinya kaga jauh-jauh dari warna merah jambu, cokelat berpita, ampe bunga mawar nyang harganye mendadak naik kaye bensin. Katanye sih hari kasih sayang, alias Valentine. Tapi buat kite, Anak BeCeng nyang ngaji dan melek sejarah, Valentine mah Bye-bye! Kagak ada potongan buat kite mah ikut-ikutan budaya nyang kaga jelas juntrungannye.
Tau kagak ente? Jauh sebelum urusan cokelat ini rame, 14 Februari itu sebenernye hari lahirnya seorang "Raksasa" nyang auranya bikin penjajah Belanda ampe Jepang gemeteran. Beliaulah Hadratussyekh KH Hasyim Asy'ari, sang mahaguru, pendiri Nahdlatul Ulama (NU), sekaligus "otak" di balik tegaknya kemerdekaan bangsa ini. Beliau lahir tepat 155 tahun nyang lalu, tepatnya 14 Februari 1871 Masehi atau 24 Dzulqa'dah 1287 Hijriyah.
إِنَّ الْعُلَمَاءَ وَرَثَةُ الْأَنْبِيَاءِ
"Sesungguhnya ulama itu adalah pewaris para Nabi." (HR. Abu Dawud & Tirmidzi)
Bukan Pinter Instan Kaye Mie Rebus!
Ente tau kagak Tong? Mbah Hasyim itu pinter bukan karena makan vitamin atau download file PDF. Beliau nyantri mati-matian dari pesantren ke pesantren di tanah Jawa, ampe nyebrang ke Mekah Al-Mukarromah. Gurunye kaga main-main, ada Syaikh Mahfudz Attarmasi ampe Syaikh Khatib Al-Minangkabawi. Beliau satu angkatan ama Syaikh Ahmad Dahlan (pendiri Muhammadiyah) pas lagi nuntut ilmu di Tanah Suci. Jadi, sanad keilmuannye itu nyambung, kaga bise digoyah kaye tiang jemuran kena angin!
Kalo kite liat semangat belajarnye, harusnye kite malu. Kite nyang idup di jaman serba gampang, mau nyari hadits tinggal Google, mau denger ceramah tinggal YouTube, malah seringan malesnye ketimbang rajinnye. Mbah Hasyim ngajarin kite kalo ilmu itu harus dijemput dengan adab dan perjuangan, bukan cuma disimpen di memori hape doang!
📺 Tonton Penjelasan Lengkap Abi di Sini:
"Jangan lupa Subscribe, Like, ama Share ye bray! Biar syiar kite makin meluas!"
Kritik Buat Gen-Z: Jangan Mau "Dibungkus" Kasih Sayang Semu
Nah, sekarang Abi mau nyablak dikit soal Valentine. Banyak bocah jaman sekarang, wabil khusus murid-murid Abi di MAN 1 atau remaja di luar sono, nyang ngerasa "kudet" (kurang update) kalo kaga ngerayain Valentine. Katanye mah hari kasih sayang. Eh, dengerin dulu, Tong! Kasih sayang dalam Islam itu 24 jam sehari, 7 hari seminggu, kaga nunggu tanggal 14 Februari doang!
Valentine itu sejarahnye kaga nyambung ama akidah kite. Malah seringan jadi kedok buat hura-hura ampe maksiat nyang dibungkus label 'kasih sayang'. Inget pesen Abi, kasih sayang nyang bener itu nyang ngebimbing ente ke jalan Allah, nyang bikin ente makin bakti ama orang tua, bukan nyang bikin ente lupa daratan ampe kebablasan. Jangan sampe cokelat sebungkus ngerusak iman ente nyang udeh dipupuk dari kecil! Say No to Valentine, Say Yes to Islam!
Resolusi Jihad: Perlawanan Tanpa Pamrih
Kemerdekaan bangsa kite ini rahmat Allah lewat doa dan fatwa Mbah Hasyim. Pas tentara Sekutu dateng bawa niat busuk mau ngejajah lagi tahun 1945, Mbah Hasyim kaga tinggal diem di pojokan masjid. Beliau kaga cuma megang tasbih, tapi juga ngeluarin fatwa dahsyat nyang dikenal sebagai Resolusi Jihad: 'Membela Tanah Air adalah Fardhu Ain!'.
Efeknye? Ribuan santri dari pelosok desa, dari Banten ampe Jawa Timur, berangkat ke Surabaya cuma bawa bambu runcing ama doa. Mereka kaga takut mati karena yakin janji Allah itu nyata. Itu sejarah, Tong! Kalo kaga ada 14 Februari 1871, kaga bakal ada tuh keberanian 10 November 1945. Mbah Hasyim-lah "Macan" Jombang nyang bikin Bung Tomo makin mantep teriak Allahu Akbar! buat bakar nyali pejuang.
Jadi, mumpung malem ini masih tanggal 14, nyok kite lurusin niat. Kasih sayang paling tulus itu ya mendoakan beliau-beliau nyang udeh bikin kite bise ibadah dengan tenang sekarang. Kirimin Al-Fatihah buat Mbah Hasyim, buat para syuhada, biar berkahnya nyiprat ke idup kite.
Makan nasi uduk lauknye emping,
Belinya di pasar deket Cengkareng.
Jangan ampe hidup ente jadi miring,
Kenalin sejarah ulama dijamin kaga melenceng.
Ustadz BeCeng • 14 Feb
وَالسَّلاَمُ عَلَيْكُمْ وَرَحْمَةُ اللهِ وَبَرَكَاتُه
🚩 SEMBOYAN ANAK BECENG:
"Aseli Betawi mah tetep tegak, ilmunya mantep, budayanya kaga bakalan retak!
Jangan Ampe Cokelat Ngalahin Sejarah, Biar Idup Kagak Salah Langkah!"
Assalammualaikum abii
BalasHapus