Assalaamu’alaikum Warahmatullaahi Wabarakaatuh!
 |
| [Foto: Landhuis Tjengkarang; sumber: https://www.nationaalarchief.nl] |
1. Gara-Gara Burung ama Poon (Versi Sunda-Betawi)
Dulu entuh, wilayah Cengkareng isinya bukan ruko ama apartemen, tapi rawa nyang rimbun bener. Namanya diambil dari Poon Cangkring (Tjengkarang). Tapi ada lagi versinya, Tong! Dari bahasa Sunda: Cingkangkareng. Ci itu aer, Karangkeng itu burung enggang nyang paruhnya ada culanya. Jadi dulu tuh tempat enih emang 'asri' bener, bukan cuman orang, ampe burung pada betah, kaga kayak sekarang, burung juga ogah lewat gara-gara polusi, wkwkwk!
Ingetin nih, ampe abad ke-19, (konon) orang situ masih 'paseh' ngomong Sunda. Jadi Cengkareng tuh sebenernya saksi bisu kawin silang budaya Sunda ama Betawi. Tapi nyang enih ente kudu cek lagi bener kagaknya yaa...?!
2. Londo nyang Doyan Ngakak (Tjankaar)
Nah, pas Londo nyampe ke mari, kupingnya emang rada bolot dikit kali yak? Mereka denger lafal lokal, terus ditulisnya Tjankaar. Ente tau artinya Tjankaar dalam bahasa Londo? Artinya 'terkekeh' alias ketawa ngik-ngik alias ngakak. Mungkin tuh Londo girang bener kali yaa pas nemu rawa luas, atau emang mereka lagi ngetawain gaya kita? Hehehe. Au da aahh... ente tanya kendiri aja sono...!
3. Kenapa Poon Cangkring pada Ngilang?
Ini nih nyang nyedihin, Abi ceritain ya. Taun 1730-an, Londo khan lagi 'gila-gilanya' ama industri gula tuh, nah mereka butuh kayu bakar gede-gedean buat masak entuh tebu. Akibatnya, poon Cangkring nyang cakep-cakep itu 'dibabatin' semua, dijadiin kayu bakar! Tega bener yak? :'( Ampe karang (sampai sekarang) Abi sendiri kagak pernah tau, tuh poon kayak mana modelannya yaa...?!
Terus, abis entuh wilayah enih dijadiin Tanah Partikelir alias tanah pribadi punya juragan. Ada pejabat VOC namanya Michiel Romp, taun 1762 dia bangun istana namanya Landhuis Tjengkarang. Jadi dulu Cengkareng tuh ibarat komplek 'elite' punya tuan tanah, akamsi mah cuma numpang kerja. Haddeehh, cappek deehh...!!
4. GANTI KTP; DAri tangerang ke jakarta
Atu lagi, ente jangan kaget, kalo nyatanya dulu Cengkareng entuh atu bagian dari Kabupaten Tangerang. Baru pas tanggal 28 Desember 1974, Pemerintah RI ngeluarin aturan resmi (PP No. 45) buat 'ngeluasin' wilayah Enyak eehh Ibu Kota. Nah, sejak waya entuh Cengkareng resmi diboyong masuk jadi bagian DKI Jakarta. Jadi, wilayah Robuaya (Rawa Buaya), Duri Kosambi, ampe Semanan nyang tadinya 'orang daerah', langsung 'direken' sah jadi warga Jakarta! Trus Kalideres ama Poris Barat jadi madunya.
🛡️ WEJANGAN ABI BUAT ENTE
"Abi ceritain ini biar ente paham, Jakarta ini dibentuk dari perjuangan, aer, pepoonan ama doa para ulama. Di Cengkareng itu ada jangkar spiritualnya, Guru Usman Perak, Guru Ma'mun, Guru Wahab dan, alhamdulillah Abi punya guru nyang luar biasa di Basmol, KH. Ahmad Syarifuddin, anaknya Guru Dul, muridnya Guru Majid. Dan terutama guru Abi tercinta KH. Asnawi bin H. Ja'far, nyang minterin abi baca Al-Qur'an ama tetek bengeknya"
"Jangan cuman pinter gaya doang, tapi adab ama sejarah kudu tau. Kalo ente tau asal-usul, ente kaga bakal gampang 'dikadalin' ama jaman. Ngerti ente semua...!?"
Wassalaamu’alaikum Warahmatullaahi Wabarakaatuh.
Cipadu, Januari 2026
🚩 SEMBOYAN ANAK BECENG:
"Aseli Betawi mah tetep tegak, ilmunya mantep, budayanye kagak bakalan retak!
Biar jaman berobah serba mesin, adab ama tradisi jangan ampe ente empasin!"
Tidak ada komentar:
Posting Komentar