NGEBET BUKU DIGITAL ANAK BECENG; Dari Pengkolan Cengkareng Ampe Nyangsang di Cipadu [Hal.1]

📖 TONGKRONGAN BETOKAW: RELIGIUS STIL [MUKADIMAH BUAT NGEBETIN BUKU]

Bismillaahirrohmaanirrohiim, Assalaamu'alaikum wr. wb.

Salam kenal dari Ipuh alias Q-Put, anak Pedongkelan

Enyak, Babe, Encang, Encing, Abang, Mpok, Anak, Cucu, Ponakan, Sepupu, Konco, Relasi, Kenalan, Entong, Eneng, Murid, rombongan Netizen nyang bererotan (Abi takut marah tar kalo kagak disebutin, kapan ente tau adatnya netizen +62 enih, hehehe), pokoknya semuanya dah... kagak pake kecoali atu juga... Abi pengen ngomong tentang Betawi nih, ente baca dulu sebelon ente kebet (ngebalik) halaman buku digital Abi nyang enih yaa... Pelan-pelan aja bacanya... sambil ngegelosor, deprok atawa nyantai di teras depan rumah ente masing-masing...

 

Ngomongin Betawi mah emang kagak bakalan abis ampe kapan juga, sama ajah kayak ente ngomongin suku nyang laen juga. Soalnya (ini bukan pertanyaan, tapi sebab) khan masing-masing punya gaya, adat, basa (bahasa), tipe (watak), dan latar (bukan halaman, mangkanya bacanya sambung ama buntutnya.. hehe) belakang budaya masing-masing.

Nah terus ngapa Abi ngomongin Betawi doang? lah karena emang entuh nyang abi tau dari kecit (kecil) ampe karang (sekarang), secara (ini pahamin pake basa anak Gen-Z... wkwkwk) Abi ngeberojol (dilahirin) di Cengkareng dari turunan moyang Abi nyang ujungnya (kediteks, artinye bisa terdeteksi kebenarannya) Mairin alias Mi Ying. Nah tentang pongkol nyang enih, Abi saranin ente baca tulisan Abi nyang bekisah perjalanan hidup Abi di blog ini juga.

Kembali ke Betawi... karna banyaknya entuh impormasi -inget, kebanyakan Betawi susah ngucapin F ama V, dan sering ngalihin n jadi m dalam beberapa ucapan- tentang Betawi, mangka Abi coba buat nyampein ke ente atu-atu, dan bisa jadi ada nyang kagak ngepas atawa sempurna. Nyang jelas, ini usaha Abi selagi masih dikasih umur buat ngelestariin Betawi, paling kagak Betawi Cengkareng alias BeCeng.

Nah entar atu-atu Abi akan kopein tentang Betawi selaku BeCeng doangan. Kalo ente Betawi juga, aseli juga, tapi kagak ngepas ama ente, bisa jadi ente Betawi laen, bisa jadi ente Betawi Kemayoran, Ciledug, Condet, Parung, Depok, Tangerang, Robuaya, Klender, Buncit, Kalibata, Ciputat, Tenabang, Cililitan, Bon Jeruk, Robelong, Palmerah atawa laennya, ampe Kerawang, Bekasi, atawa Bogor (mohon maaf nyang belon kesebut yaa...? tar kalo disebutin semuah, kayak lagi ngabsen di kelas, takut ada yang madol). Jadi boleh aja ente komen, entar kita diskusiin bareng, kalo perlu kite ketemuan buat kongkow langsung di satu tempat. Enak khan...?

Udah deh, entuh aja dulu nyang mo Abi (kok pake Abi, bukan gue? Iya, soalnya ini blog juga buat semua orang nyang dateng nyaba, sengaja apa kagak, itu bukan urusan Abi. Ada sohib kentel, ada murid ngaji, ada sepuh kampung, ada murid sekolaan, ada nyang necis, ada nyang uragan, semua bisa jadi mampir di sini, jadi pake basa Abi buat nyebutin diri kayaknya lumayan pas buat semua, secara ini panggilan nyang biasa buat Abi sehari-hari) sampein di tulisan resmi Abi buat ngebuka Blog Anak BeCeng Asli ini... Selamet melototin dan nikmatin kalo mao, kagak puas? Jelas... sebab Abi bukan pemuas semua orang... hehehe

Wassalaamu'alaikum...
Cipadu (tempat nyangsang Abi di dunia),
Januari 2026

🚩 SEMBOYAN ANAK BECENG:

---

"Biar kata jidat benjol ditimpuk bakiak, biar kata banjir kaga brenti nanjak... Aseli Betawi mah tetep tegak, ilmunya mantep, budayanya kaga bakalan retak!"

#AnakBeCengAsli #BetawiCengkareng #MelestarikanTanpaPamrih

🖨️ Simpan PDF / Print